የግብፁ የማዕድን ኩባንያ አስኮም የሚሌኒየም ግድብ በሚገነባበት ቤኒሻንጉል ጉሙዝ ክልል ውስጥ ባካሄደው የወርቅ ፍለጋ ከፍተኛ የወርቅ ክምችት ማግኘቱ ተረጋገጠ፡፡ የግብፁ ኩባንያ አስኮም ከአንድ ዓመት በላይ ለሆነ ጊዜ በክልሉ 8,000 ስኩዌር ኪሎ ሜትር ቦታ ላይ ወርቅና የከበሩ ማዕድናትን ሲፈልግ ቆይቷል፡፡

ቦታውን ከማዕድን ሚኒስቴር የተረከበው ኩባንያው፣ የማዕድን ፍለጋውን ኢትዮጵያን ጨምሮ በሱዳንና አልጀሪያ በተለይም ‹‹በዓረብ ኑብያን ሺልድ›› ክልል ውስጥ አጠናክሮ መቀጠሉ ታውቋል፡፡

ከኩባንያው የተገኘው መረጃ እንደሚያመለክተው፣ በዓረብ ኑቢያን ሺልድ ክልል ውስጥ በተለይም በምዕራብ ኢትዮጵያ ቤኒሻንጉል ክልል ውስጥ ወርቅና ከወርቅ ጋር ተቀራራቢነት ያላቸውን የማዕድናት ክምችት አግኝቷል፡፡

የማዕድን ሚኒስቴር የማዕድን ሥራዎች ቁጥጥር መመሪያ ኃላፊ አቶ ገብረ እግዚአብሔር መኮንን ለሪፖርተር እንደገለጹት፣ የኩባንያው ግኝት ለአገሪቱ ትልቅ ትርጉም አለው፡፡

የማዕድን ፍለጋ አስቸጋሪ እንደመሆኑ መጠን ኩባንያው በትዕግስት እዚህ ውጤት ላይ መብቃቱ አስደሳች መሆኑን አቶ ገብረ እግዚአብሔር ገልጸው፣ ኢኮኖማያዊ ጠቀሜታውም የጎላ እንደሆነ አስረድተዋል፡፡

አስኮም በግብፅ የካፒታል ገበያ እ.ኤ.አ. በ2009 የተቋቋመ ኩባንያ ነው፡፡ በማዕድን ፍለጋና ማውጣት ሥራ ላይ የተሰማራ ኩባንያ ሲሆን አትራፊም ነው፡፡

የወርቅ ማዕድን በዚህ ክልል ያገኘው አስኮም ብቻ አይደለም በሼክ መሐመድ ሁሴን አሊ አላሙዲ የተመሠረተው ማድሮክ ጐልድም የወርቅ ክምችት አግኝቷል፡፡ ሚድሮክ ጐልድ ከማዕድን ሚኒስቴር በቤንሻንጉል ክልል ቡለን ወረዳ ሞር አካባቢ ከሁለት ዓመት በፊት የወርቅ አሰሳ ፈቃድ አግኝቷል፡፡

በአሰሳው የወርቅ ክምችት በማግኘቱ በጥቂት ጊዜያት ውስጥ ፍለጋውን አቁሞ ወደ ሥራ ለመግባት የሚያስችለውን ሪፖርት ለማዕድን ሚኒስቴር አቅርቦ የማዕድን ማውጪያ ፈቃድ ይጠይቃል ተብሎ ይጠበቃል፡፡

የሚድሮክ ጐልድ ምንጮች እንደገለጹት፣ ባለፉት ሁለት ዓመታት ፍለጋው ሲካሄድ ቆይቷል፡፡ ይህንን የፍለጋ ቦታ ሼክ አላሙዲም ሆኑ የኩባንያው ዋና ሥራ አስኪያጅ ዶ/ር አረጋ ይርዳው ጎብኝተውት አያውቁም፡፡ ይሁንና በስፍራው የወርቅ ክምችት እንዳለ መረጃዎች ከተገኙ በኋላ ዶ/ር አረጋ ስፍራውን ለመጎብኘት ዝግጅት እያደረጉ መሆኑን ምንጮች ገልጸዋል፡፡

ኩባንያው በቅርቡ በቀጣይ ዕቅዶቹ ዙርያ መግለጫ እንደሚሰጥ ለኩባንያው ቅርበት ያላቸው የመረጃ ምንጮች ያስረዳሉ፡፡

ሚድሮክ ጐልድ ቀደም ሲል የመንግሥት ይዞታ የነበረውን የለገደንቢ የወርቅ ማዕድን ማውጫ በ172 ሚሊዮን ዶላር በመግዛት ወደ ሥራ የገባ ተቋም ነው፡፡ ከዚህ በተጨማሪ በሳካሮ አካባቢ የወርቅ ፍለጋ በማካሄድ ክምችት አግኝቷል፡፡ ከሁለት ዓመት በፊት በተለይ ወርቅ ለማውጣት ከሚኒስቴሩ ጋር ተፈራርሞ ሥራ የጀመረ ሲሆን፣ የቤኒሻንጉሉ የወርቅ ክምችት እንዲቆፈር ከተወሰነ ለኩባንያው ከለገደንቢና ከሳካሮ ቀጥሎ ሦስተኛው የወርቅ ማውጫ ቦታ ይሆናል፡፡

Advertisements